العامية المغربية
لا التيق وااا هيا
تألمت حتا طاب القلب
و القلب حرقتو كاوية
سال دمعي و شكى لهدب
و الدمعة في العين حامية
كنت ناوي عليها نكتب
ضاع لقلم و الدواية خاوية
حبيبتي و بان فيها لعجب
و ما عْرَفْتْ علاش ناوية
ما بقات تدوي في الحب
حبيبتي و ديما تلقاها ملاهية
تبعد كل ما نا نَقْرَب
مشغولة ديما عني و ساهية
رجعنا كل ليلة ف الحرب
في الغالب الاسباب واهية
من غير ما ندير العيب
نلقاها غضبانة و شاكية
نْقيَّل ف خدمتي نحطب
نروح مهدود و الدار ما هانية
يلا قلت باغي نشرب
ما ترد و تبقى فيا فاهية
واش نضرب و لا نندب
ما قدرت نشعل البيت عافية
تقيل تبخر و تعشب
تداوي مرضى و هي ما مداوية
تظن نفسها تفهم ف الطب
جاهلة و أمية و ما قارية
عاكgرة تجي باغيا تنجب
و الدار راها صبحت زاوية
واش تعاون و لا تنصب
أو هواية و فيها غاوية
كل من شاف امري يتعب
لكن هي ديما زاهية
ما قدرت عليها نركgب
تَصْدَق في المحكمة مداعية
كنت رباب ديما نطرب
و اليوم أوتاري ما مساوية
مجرد شِعر و راني نجدب
أَمَّا نا عايش عيشة متاوية
راه الشاعر ديما يكذب
لا التيق بكل كلامو وا هية
نطلبوا مغفرة من الرب
ف كل كلمة قلناها خاطية
يزيد علوي اسماعيلي
ليست هناك تعليقات:
إرسال تعليق