مجلة ملتقى الشعراءوالأدباء...السبع بنات .((رواية))..ح12... بقلم المتألق والمبدع الأستاذ رضا الحسيني

السبع بنات .. رواية / رضا الحسيني (12)

_ عشان كده ياأبله ماما الحاجة قلقانة عليكي كتير 

_ حكت حاجة يافريدة .. سمعتيها بتتكلم مع حد عني

_ أه ياأبلة اتكلمت كتير مع بابا الحاج عنك ..وجت أبلة نور كمان واتكلموا ... بس مافهمتش كتير من كلامهم 

_ ولايهمك حبيبتي .. خلينا فيكي إنتي دلوقتي .. يلا قومي على مدرستك وابقي تعالي ذاكري هنا مع نجوى .. هتفرح أوي بيكي

_ حاضر يااحلى أبله في الدنيا كلها

.. وخرجت من عند أبلة حكمت وأنا أشعر بأن شيئا ما تعيشه وحدها 

.. وحين عُدت بعد المدرسة للبيت حكيت لماما كل شيء حسيته بأبلة

حتى أنها شعرت مثلي بنفس الإحساس فوجدتها تجلس بالبلكونة إلى وقت الغداء .. وكان الغداء صامتا كله عيون متجمدة .. وقمنا كما جلسنا تقريبا لم نأكل منه إلا القليل ..

_ إزيك يارياض .. إيه جاي منين كده

_ أزيك ياست حكمت .. أبدا كنت بذاكر بعد المدرسة مع عادل البورسعيدي شوية .. كان فيه حاجات عاوزني أشرحهاله 

_ طب ماتبقى تيجي يارياض تذاكر مع نجوى والولاد .. إنت ماشاء الله عليك شاطر وتقدر تساعدهم .. وهم زي إخواتك برضو

_طبعا إخواتي ياست حكمت .. وأنابحبهم كمان أوي .. ونجوى بنت مؤدبة وهادية خالص غير مفيدة خالتها شقية أوي ولِعبية

_ طب تعالى ادخل هُمً قاعدين بيذاكروا

.. يانجوى .. ياولاد .. رياض جاي يذاكر معاكم ..إوعو حد منكم يضايقه

_ نضايقه إزاي بس ياماما ..رياض ده كلنا بنحبه ..إحنا بنحسه أخونا

.. تعالى يارياض .. والله إنت ابن حلال .. أناعندى حاجات في العربي مش قادرة أفهمها خالص .. يلا تعالى ادخل

_ يلا يانجوى .. ماتقلقيش العربي كله حاجات سهلة .. بس لازم تحبيه الأول .. تعالي وريني

.. إزيكم إمام .. إزيك ياناصر

_ أهلا رياض ..تعالى .. إنت هتروح ماتش بكره الاستاد

_ ماتش إيه بس ياإمام ..إحنا داخلين على امتحانات .. لازم بقى نذاكر

_طالع مجنون كورة زيك يارياض .. بس إنت ماشاء الله عليك بتلعب حلو أوي.. أنا شفتك

_ بجد يانجوى شفتيني وأنا بلعب ..

_ ههههه ..أه .. وانت بتجيب جون في الملعب اللي عند الأرض الفاضية دي .. كنت عند آمال صاحبتي بنذاكر في البلكونة وشفناك سوا .. وعرفت منها إنك على طول بتروح تلعب هناك

_ آآآه آمال .. بقى اسمها آمال وصاحبتك

_ ليه فيه إيه ..إنت بتعرفها

_ لأا أبدا .. بس بشوفها على طول وأنا بلعب هناك واقفة في البلكونة وكأنها بتكون عارفة إننا هنلعب

_ واضح يابيه إنك واخد بالك منها أوي .. إتكشفت

_عارفة يانجوى .. كلام في سرك .. شوفي آمال دي بنت جميلة قد إيه .. بس ولا حاجة جمبك

_والله .. أومال ليه عينك عليها ليه كده

_ إنتم بتتوشوشو في إيه بقى .. عاوزين نذاكر

_ أنا بشرحلها بصوت واطي عشان إنتم تعرفو تذاكروا كويس .. يلا ذاكروا .. عملت الواجب بتاعك ياناصر .. 

_ أه بعمله أهو .. 

_ طب وريني كده ..

... ياسلام ياسلام .. هو الواجب ياسي ناصر عن بيبو وزيزو ولا إيه .. يابني كفاياك لعب بقى.. أنا هنده لمامتك أقولها

_ وأنا هقولها عن آمال برضو

_ يخرب عقلك ياناصر .. إنت كمان ودانك واصلة لحد هنا

.. إبعد عنه يارياض وتعالى نكمل مذاكرتنا .. ناصر ده مافيش فايدة فيه ..

_ يافريدة ..يابنت يافريدة

_ نعم ياماما .. فيه إيه ياحبيبتي .. مالك ياقمر .. 

_ تعالي اندهي لاختك حكمت وولادها يتغدوا معانا ..وفوتي كمان على وزة ونور قوليلهم .. 

_ ليه فيه إيه ياماما .. فيه عريس جايلي النهاردة ههههههههههه

_ عريس في عينك .. إمشي روحي بسرعة قبل أبوكي الحاج مايرجع

_ حاضر ياسمسمة ياقمر إنتي ياأم العروسة ههههههههههه

                                    إلى اللقاء مع الحلقة13